12月25日~~歡笑夾雜眼淚
Merry Christmas!!!!又到聖誕節喇!!!
今個聖誕節, 我同媽咪同細細妹, 仲有比比過
冇好豐富嘅聖誕大餐, 亦都冇收到好貴重嘅聖誕禮物, 冇去到好熱鬧嘅count down
但心情比往年更開心
我諗冇嘢比同最愛嘅人一齊更令人開心…
一早同媽咪, 細細妹, 比比, 仲有媽的老死去左飲茶
之後去左烏溪沙, 媽咪佢地愛上左掘蜆
一路行過去, 好大風, 但又好舒服, 吹下令個人好醒
佢地一去到就好快去左海邊掘
我同比就散下步, 吹下風
好快就走左, 媽佢地就好起勢咁掘
見到媽咪好開心咁, 我又好開心, 從心裡面笑左出o黎, 只係希望仍 唔係將自己唔開心嘅嘢收收埋埋…
番左屋企, 就打下日記做下莊務咁
icq 同意粉chat 左一陣, 同佢傾左有關自己興趣同埋社工
其實我真係覺得大學唔係career training center, 讀社工唔係一定要做社工
大學只係一個platform , 俾我地去發現一下自己, 追尋價值觀嘅地方
對於社會冇一團好熊嘅火唔代表冷酷無情, 每個人都有一團火, 只不過團火燒嘅位置唔同….
又同一個移民去左溫哥華的好朋友chat 左一陣
佢1月19日就番香港喇, 超開心, 我地有足足八年冇見……真係好掛住佢
我問佢結左婚未, 佢覺得好奇怪, 以為我結左…..hahahahaha
我呢d事業型女性, 唔會咁快結婚呢!!!!!
之後一個人睇左 <<美麗拳王>>, 一個真人真事
擁有男兒身, 但內心就係女兒心
為左屋企人生活, 又要去打拳贏獎金
擂台上就打得好狠, 擂台下就鍾意化妝同煮餸
由起初唔敢俾人知道自己鍾意做女人, 到後來勇敢地化妝上擂台, 當中俾過好人人笑, 俾人侮辱, 俾人當怪物
記得暑假時同紫藤去左泰國愛滋病會, o係global village 入面都見到好多transgender, gay, 同鍾意扮女性嘅人, 仲一齊入左女廁
開頭見到佢地, 坦白講, 感覺唔係好習慣
於是我就特登留耐d, 發現佢地好開心, 一大班一齊化妝又講又笑, 真係好歡樂
睇完套戲又少少諗法
戲中佢講左一句: 做男人難, 做女人難, 但最難都係做一個忠於自己嘅人
其實呢個社會有好多人好多時都會因為一d 外在環境令自己唔能夠忠於自己
當然, 對o個d 擁有非主流性取向嘅人, 呢種掙扎同心靈上嘅殘廢令佢地生活得好痛苦……
晚上又同比睇左I Robort 同小Q------睇小Q喊到癲左!!!
套戲唔係太感動
不過自己睇到死亡嘅時候, 內心就好恐懼, 眼淚就不停咁流
無論係主人嘅死同小Q嘅死, 我都喊到收唔到聲
比比越安撫我, 我就越停唔到
見到死亡嘅情節, 我腦入面就浮起好多人嘅面孔
我唔想身邊會有人死, 唔知道點去面對呢一種別離
我諗到自己, 我自己都好唔想死…..
死亡, 真係全世界最恐怖嘅事
又諗起WASABI 嘅狗狗阿妹, 佢都成七十幾歲(當人嘅年齡計算), 如果有一日佢死左, WASABI 一定崩潰……我都會好傷心
諗下諗下都唔敢再諗
比比睇住我瞓之後佢就走
好想同佢講: 你唔好死, 或者至少俾我死先, 因為我會唔知點樣面對
但眼淚仍然流, 個人仍然抽搐, 一句說話都講唔出…..
瞓唔著, 心情仍然好差
只係覺得自己都幾無聊睇戲都會諗埋晒咁多嘢, 仲咁易喊……..
posted by FRAIS FEMMES BAU @ 12/26/2004 11:07:00 AM
0 Comments:
Post a Comment
<< Home